(突發)李逸朗爆性史 葉翠翠會主動提供「特別服務」

今年中秋節認真惹「火」！繼女星葉璇於內地節目辣火頭寸爆內地女星陳紫函乃千年老二後，藝人李逸朗（Don）昨日亦於ViuTV節目內被大爆性史，當中矛頭指向舊愛葉翠翠，令已為人妻的她大為尷尬，事後Don接受電話訪問時，對這段舊情答得模稜兩可，不過翠翠就否認Don是其舊愛。

李逸朗與前港姐冠軍葉翠翠未入行時均曾任模特兒，可算識於微時，後來男方被拍到於翠翠家短敍，因而爆出二人拍拖，惟雙方例牌否認，至今從未承認雙方關係。昨日Don為ViuTV節目《晚吹－啪啪聲，太好聽》任嘉賓時，與主持鄧洢玲（阿旦）及梁梓禧探討性愛體位，被阿旦踢爆他於節目中指每個女友也肯與他上床兼「特別服侍」。

對此，Don未有否認，對於所有女友也肯為他「服務」，問到最深刻是否舊愛葉翠翠？Don即扮失憶說：「嫁咗人嗰個？唔記得啦，不過每個我都好深刻嘅，因為都愛過。（講得咁矛盾？）意思係我對份感情係深刻，過程就忘記啫！（咁有冇拍片習慣？）冇，影相都冇，通常都係拍拖合照，有著衫嘅，今日嚟呢度係長知識嘅，阿旦好勁，識得曬48個性技巧。」

自嘲荒廢多年

談到於節目中再爆喜歡「龍舟掛鼓」的性愛招式，即被主持人追問該女子個子高不高及趣不趣，取其舊愛葉翠翠名字，Don笑說：「個動作係好難先做到，好吃力，講呢啲真係好尷尬，頭先都有同啲男仔示範好多體位。」現時單身的他自嘲已荒廢多年，雖然34歲已到適婚年齡，但尚未遇上合適對象，問他留甚麼給將來太太？Don笑言：「同老竇當年畀我一樣，就係條毛，因為有72變，其實係留份感情同愛畀太太，總之有好消息會同大家講。」及後，梁梓禧又即席與Don示範不同性愛姿勢，梁梓禧更抵死向Don說：「你當我係港姐，叫我港姐冠軍得嘞！」再度擺他與翠翠的舊情上檯。

懶理網民鬧爆

因Don於節目內的言論令人輕易聯想到葉翠翠，隨即被網友鬧爆，直斥此舉對已為人妻的翠翠造成很大傷害，實屬不應該！本報昨日就Don激烈言論致電翠翠，她否認曾與他拍拖：「佢唔係我舊愛，所以佢嘅生活唔關我事，人哋嘅嘢唔回應啦！」

而Don被問到翠翠有否為他「特別服侍」?他於電話表示：「過去嘅嘢都唔想講太多，我尊重每個人，幾十年前嘅嘢唔好講。（被網友鬧爆喎！）冇所謂啦！呢個係綜藝節目，唔係講感情事，我冇喺入面提所有前度女友嘅嘢，覺得冇咁嘅必要。（會否打畀翠翠say sorry？）唔會啦！我都冇提佢個名，同埋咁多年都冇聯絡啦！（佢唔認同你拍過拖，咁究竟有冇呢？）唔記得嘞！人哋都結咗婚囉！」